మీ పక్కన ఎవరికైనా ఫిట్స్ వస్తే ఏం చేయాలి?

Dr. Karuturi Subrahmanyam
3 days ago
2 min read

ఒకరి ముందు అకస్మాత్తుగా కిందపడటం, శరీరం అణచలేని విధంగా వణికిపోవడం చూసినప్పుడు మనం భయపడటం సహజం. కానీ అలాంటి సమయంలో సరైన సమాచారం ఉంటే, ఆ వ్యక్తిని గాయాల నుంచి కాపాడొచ్చు, అవసరమైతే ప్రాణాలు కూడా రక్షించవచ్చు.

ఫిట్స్ అనేది ఒక వైద్య పరిస్థితి, దీన్ని అర్థం చేసుకొని, దయతో, ధైర్యంతో స్పందించాలి.

✅ మీరు చేయాల్సిన ముఖ్యమైన 10 విషయాలు:

1. శాంతంగా ఉండండి & భద్రతను చూసుకోండి

మీరు ప్రశాంతంగా ఉండటం చుట్టుపక్కల వాళ్లందరికి ధైర్యాన్నిస్తుంది. మూర్ఛ వచ్చిన వ్యక్తి చుట్టూ పదునైన వస్తువులు, వేడి వంట పాత్రలు లేదా రోడ్డు లాంటి ప్రమాదకరమైన ప్రదేశాలు ఉంటే – ఆ వస్తువులను జాగ్రత్తగా తొలగించండి.

వారు తక్షణ ప్రమాదంలో లేకపోతే – వారిని కదిలించకండి.

2. ఫిట్స్ ఎప్పుడు మొదలైంది గమనించండి

ఒక్కోసారి ఫిట్స్ 1-2 నిమిషాల్లోనే ముగుస్తుంది. కానీ 5 నిమిషాలు దాటితే వెంటనే అత్యవసర సహాయం కోసం 112కి కాల్ చేయాలి.

3. తల కింద మృదువైన వస్తువు ఉంచండి

తల బలంగా నేలకి తాకకుండా ఉండేందుకు, జాకెట్ లేదా బ్యాగ్ లాంటి మృదువైన వస్తువులు తల కింద ఉంచండి.

4. వీలైతే, వారిని ఒక వైపుకు తిప్పండి

వాంతులు లేదా లాలాజలం వస్తే, అవి ఊపిరితిత్తుల్లోకి పోకుండా నివారించడానికి వారిని ఒక వైపు తిప్పడం మంచిది. ఇది శ్వాసను సులభతరం చేస్తుంది.

5. వారిని పట్టుకోకండి

వారి శరీరం వణికే దశలో వారిని బలవంతంగా ఆపే ప్రయత్నం చేయకండి. అది మూడూ వారికి, మీకూ గాయాన్ని కలిగించవచ్చు. ఫిట్స్ ను దాని సహజ మార్గంలో కొనసాగనివ్వాలి.

6. నోటిలో ఏ వస్తువూ పెట్టకండి

చెంచా, తాళం, బట్ట వంటి వస్తువులు నోటిలో పెట్టడం వల్ల నాలుకను కరవకుండా ఉంటుందని కొందరు నమ్ముతారు. కానీ ఇది చాలా ప్రమాదకరం. ఊపిరితిత్తులను అడ్డగించడం, నోటి లోపల గాయాలవుతాయి. నోటిని నొక్కడమూ, తెరచడమూ అవసరం లేదు.

7. వారు పూర్తిగా కోలుకునే వరకూ వారి పక్కన ఉండండి

ఫిట్స్ ముగిసిన తర్వాత వారు అలసటగా, గందరగోళంగా ఉండొచ్చు. వారిని సాంత్వనపరచండి, దయతో మాట్లాడండి. అవసరమైతే కుటుంబ సభ్యులకు సమాచారం ఇవ్వడంలో సహాయపడండి.

8. ఈ సందర్భాల్లో వెంటనే 112కి కాల్ చేయండి

ఫిట్స్ 5 నిమిషాలకంటే ఎక్కువగా కొనసాగితే
మళ్లీ మళ్లీ ఫిట్స్ వస్తున్నాయంటే
ఫిట్స్ తర్వాత స్పృహలోకి రాకపోతే
శ్వాస తక్కువగా ఉంటే లేదా గాయాలుంటే
ఇది వారి మొదటి ఫిట్స్ అయితే

9. చుట్టూ గుమిగూడవద్దని చెప్పండి

వారికి ప్రైవసీ అవసరం. అందరూ చుట్టూ గుమిగూడడం, వీడియోలు తీయడం అత్యంత అనుచితం. ఇది వైద్యపరమైన అత్యవసర పరిస్థితి, వినోదం కాదు.

10. పూర్తిగా కోలుకున్న తర్వాత సాయమివ్వండి

వారు స్పృహలోకి వచ్చాక తాము ఎక్కడ ఉన్నామో, ఏం జరిగిందో అర్థం కాకపోవచ్చు. మెడికల్ ఐడీ, బ్రాస్‌లెట్ ఉంటే ఆ సమాచారం ఉపయోగపడుతుంది. వారు ఒంటరిగా ఉన్నారు అనిపిస్తే, వారిని ఒంటరిగా వదిలేయకండి.

❌ అపోహలు – అపాయమే

భారతదేశంలో సాధారణంగా కనిపించే అపోహ – తాళాలు లేదా లోహ వస్తువులు చేతిలో పెట్టడం ఫిట్స్ తగ్గిస్తుందని నమ్మకం. ఇది పూర్తిగా తప్పు.

ఫిట్స్ “లోహం,” “భయం,” లేదా “షాక్” వల్ల కాదు – ఇది మెదడులో జరిగే విద్యుత్ లోపం వల్ల వస్తుంది.
తాళాలు లేదా లోహ వస్తువులు పట్టించడం వల్ల మెదడు పై ఎలాంటి ప్రభావమూ ఉండదు.
దీనివల్ల విలువైన సమయం వృధా అవుతుంది మరియు గాయాల అవకాశాలు పెరుగుతాయి.

👉 ఫిట్స్ ఒక వైద్య సమస్య — మూఢనమ్మకంతో కాదు, శాస్త్రీయ పద్ధతులతో పరిష్కారం కావాలి.

📢 చివరగా…

ఫిట్స్ అనేది విచారించాల్సినది కాదు, విచక్షణతో స్పందించాల్సినది.

మీ స్పందన ఎంత శాంతంగా, సమాచారంతో కూడినదిగా ఉంటుందో, ఆ వ్యక్తి ఆరోగ్యం అంత మంచిగా ఉండే అవకాశం ఉంటుంది.

మానవత్వంతో ముందుకెళ్లే సమాజం కోసం, భయపడే వారు కాకుండా – సహాయపడే వారు కావాలి.

📞 భారతదేశ అత్యవసర నంబర్: 112

ఈ నంబర్‌ను మీ ఫోన్‌లో సేవ్ చేసుకోండి.

ఈ సమాచారాన్ని మీ కుటుంబ సభ్యులు, స్నేహితులతో పంచుకోండి – ఇది ఒకరి ప్రాణాన్ని కాపాడగలదు.

డాక్టర్ కరుటూరి సుబ్రహ్మణ్యం, MD, FRCP (లండన్), FACP (అమెరికా)

ఇంటర్నల్ మెడిసిన్ స్పెషలిస్ట్

కిఫి హాస్పిటల్

దానవాయి పేట

రాజమండ్రి

ఫోన్ : 85000 23456